كاسل الحضارة والتراث Written by  أيار 07, 2021 - 521 Views

عين كليوباترا المقدسة بواحة سيوة

Rate this item
(0 votes)

 بقلم – ميرنا محمد

مرشدة سياحية

اغتسل فيها الإسكندر الأكبر، والإله أوزيريس، والملكة كليوباترا، حكايات فى ثلاث قصص

القصة الأولى: الإسكندر الأكبر يغتسل في (عين شمس)!

أول قصة،، عن الإسكندر الأكبر، اللي كان أشهر ملك في العالم وقت ما دخل مصر، والعجيب ان له قصة غريبة مع عين كليوباترا، واللي وقتها كان اسمها (عين شمس) نسبة للإله آمون إله الشمس عند قدماء المصريين، اللي كان ليه معبد في واحة سيوة!

القصة بتبدأ ان الإسكندر وصل سيوة في شهر يناير ٣٣١ق.م علشان يحصل على البركة من معبد آمون وبيت الإله (قدس الأقداس) وضمن طقوس البركة هو الاغتسال في عين شمس للتطهر، وفي اللحظة دي اتخلدت عين شمس واحدة من أشهر العيون في التاريخ ومدينة سيوة اللي بقت واحدة من أشهر المدن وقتها.

القصة التانية،، هي قصة أسطورة إيزيس والإله أوزيريس، اللي قتله أخوه إله الشر (ست) وقطع جسمه لأجزاء وزعها على كل أقاليم مصر، وقتها زوجته الإله إيزيس قررت انها تجمع أجزاء جسمه علشان تعيده للحياة مرة تانية عن طريق التراتيل والصلاة، وعلشان يعود للحياة مرة تانية كان لازم يغتسل بمياه عين شمس المقدسة وبالفعل عاد للحياة مرة تانية، وقدر ابنه الإله حورس انه يتغلب ويقتل إله الشر ست!

القصة التالتة ،،والأخيرة، هي قصة (كليوباترا سيليني) ابنة الملكة كليوباترا وزوجة الملك الأمازيغي (جوبا الثاني) و وقتها العين كانت معروفة بإسم (ملكة العيون) أو (عين الملك) لأنها كانت خاصة بالملك فقط واسمها مرتبط باسم الإله جوبا عند الشعب الأمازيغي.

وقتها تم تخليد العين بإسم (عين كليوباترا) لأن كليوباترا الصغيرة سبحت فيها خلال زيارتها لسيوة، المدينة المعروفة بأنها البوابة الشرقية للأمازيغ، ولما تزوجها الملك جوبا الثاني قام بإطلاق اسمها على العين المقدسة بعد ما كان اسمها (عين شمس) وعين (جوبا) أو (يوبا)

ومن يومها أصبح اسمها عين كليوباترا، ولحد دلوقتي تقدر تقابل في سيوة شعبها الأصلي ولغتهم الأمازيغية القديمة، وتسمع منهم أساطير المعابد والعين المقدسة، وقصص الإسكندر وكليوباترا وأوزوريس!

من نحن

  • مجلة كاسل الحضارة والتراث معنية بالآثار والحضارة وعلوم الآثار والسياحة على المستوى المحلى والإقليمى والدولى ونشر الأبحاث المتخصصة الأكاديمية فى المجالات السابقة
  • 00201004734646 / 0020236868399
  • عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.